Responsable sa midunggab-patay sa usa ka menor de edad, padayon pang gipangita sa kapulisan!
PADAYON pang gipangita sa kapulisan ang responsable sa pagdunggab-patay sa usa ka menor de edad sa Corrales Avenue ning ciudad!
Giila ang biktima nga si Nathaniel (Nathaniel Ibalang) 13-anyos ug residente sa Ramonal Village Brgy. Camaman-an samtang giila ang suspek nga si Carl (Carl Dela Vega) ug gituohan usab nga menor de edad .
Naka-angkon ang biktima og samad-dinunggaban doul sa li-og.
Matud ni Jeff Paulo Taban, kauban sa biktima ug residente sa Brgy. Bayabas ning ciudad nga naglaag lamang sila sa usa ka dakong mall ning ciudad apan sa ilang pagawas kalit silang gi-atangan sa grupong SSB og gisumbag ug gisipa.
Gidugang pa ni Jeff nga nailog nila ang kutsilyo ug towel gikan sa grupo ug nakahuna-huna silang mosukol apan dehado kini tungod sa kadaghan hinungdan nga midagan ang uban nilang kauban.
“..kami mo’y gilabtan paggawas namo sa gaisano gilakag dayon mi taman sa Divisoria. Naa mi nakita nga pulis nangayo mi’g tabang among gi turn-over ang among nabawi mao to among gihatag nananghid mi na mamauli nami. Pamauli namo nalabyan mi sa patrol wala ko nidagan nag sakay ko sa patrol kay wala man mi sala unsa may sala namo ngano mudagan man ko. Ang pinakauna sa gaisano gisumbag ko ug gisipa ang katong nagsipa nako nabawian namo’g kutsilyo ug towel, musukol unta mi daghan man kaayo naa nay mga dagko, naa nay mga kutsilyo tag-as kaayo dagan mi nanunod man gyapon sila dagan sila sa Divisoria paingon unta mi sa Gaston nanunod sila..”
Jeff Paulo Taban kauban sa biktima
Samtang, matud ni Police Station 2 Cogon Police Investigator Police Chief Master Sergeant Feliciano Belhut nga kasong murder ang posibleng ipasaka batok sa responsable sa maong insidente.
Photo: John Dave Outcast
Published by: Jam Cutamora Saba
