Usa ka pamilyahan nga napalgang gilubong sa dakong bangag sa bukirang bahin sa Sapad Lanao del Norte, posibleng gidagit una gipatay!

GIPALAPDAN sa Sapad Municipal Police Station ang imbestigasyon sa pagpatay sa usa ka pamilyahan nga gilubong sa Sitio Lapao, Karkum, Sapad Lanao del Norte!
Naila ang mga biktima nga si Joselito Gaviola, kapikas nga si Marly Gaviola, igsoon nga si Elvie Gaviola Legara, 43-anyos, ug bana ni Elvie nga si Epefanio Legara, ug tulo ka anak nga si Jopay Legara, Jomar Legara ug Epefanio Legara Jr., nga susamang residente sa Purok Dama de Noche, Sitio Luguimit Poblacion Margosatubig Zamboanga del Sur.
Matud ni Sapad Municipal Police Station Police Chief Police Major Alibsar Daraba nga dili taga Lanao del Norte ang mga biktima hinungdan nga padayong gisuta kung diin gipatay ng mga biktima una gilabay sa lugar.
Gilantaw usab sa kapulisan kung gidagit una ang mga biktima una gipatay tungod makita sa usa sa mga biktima nga gigapos pa kini ug susama naka-angkon sa samad pinusilan sa ulo.

“..unsay hinungdan ngano nakaabot sila sa among area, posible gi abduct sila before sila gidala diri kay kung atong tan awon dili na taga diri. Basin naay personal grudge, pag dumot aning pamilya nga gikan sa Zamboanga gidala sa Lanao del Norte. Wala pa tay witness, ako lang gihangyo ang katawhan kung basig naay nakakita niani gikan didto sa ilang panimalay padulong sa terminal padulong asa napadpad hangtod niabot diri sa among Municipality..”
Sapad Municipal Police Station Police Chief Police Major Alibsar Daraba

SOURCE: SBPSH
Photo: CTTO