Bongga nga pagsaulog sa pasko likayan; pag-donar sa mga nabiktima sa bagyo, panawagan ni PBBM sa mga ahensya sa gobyerno!

GI-AGHAT sa Office of the Executive Secretary ang tanang ahensya sa gobyerno nga likayan ang bongga nga pagsaulog sa Pasko!
Subay kini sa panawagan ni President Ferdinand Marcos Jr. sa government agencies nga mag-donar sa mga komunidad nga naigo sa kalamidad ug likayan ang “grand Christmas celebrations”.
Sa pamahayag sa Office of the Executive Secretary, gi-aghat usab ang mga ahensya nga i-donar ang bisan pila nga natigom gikan sa gipamunisan nga selebrasyon.
Ang panawagan agi’g pakighi-usa sa minilyon ka tawo nga nagbangutan sa ilang kinabuhi, balay ug panginabuhi-an nga nawala tungod sa unom ka bagyo nga mihapak sa nasud, wala ra nag-usa ka bulan.
Pipila ang nahimong super typhoon category nga mi-igo sa Luzon ug Visayas hinungdan sa pagkawala sa kinabuhi ug dakong damyos sa kabtangan.
Matud ni Executive Secretary Lucas Bersamin nga dili na kinahanglan nga mag-isyu og opisyal nga kamandoan tungod nagtuo sila sa kaayo sa kaubang kawani sa gobyerno diin ilang gisaligan nga makahimo sa pagdaginot sa ilang selebrasyon.

SOURCE: INQUIRER/GMA
Photo:Republic Asia