Lalaki gidunggab-patay sa kaugalingong bayaw sa Claveria, Misamis Oriental!

MAG-ATUBANG sa kasong murder ang usa ka lalaki nga midunggab-patay sa iyang bayaw sa Sitio Impakibil, Brgy. Apos Kahoy, Claveria Misamis Oriental!
Naila ang biktima nga si Erick Gallegos, 35 anyos, menyo, taga Purok 8 Brgy. Mat-i samtang naila ang suspek nga si Julius Mete, 52 anyos, menyo ug residente sa Sitio Impakibil, Brgy. Apos Kahoy.
Matud ni Claveria Municipal Police Station Investigator on Case Police Master Sargent Colombus Tion nga nag-inom sa payag ang suspek ug biktima kauban ang igsuon niini nga asawa ni Mete.
Apan pagka-alas 9:32 sa gabii, midalikyat ang suspek sa Chief Tanod sa Brgy. og mi-angkon nga nakapatay kini.
Sa pagsusi sa otoridad, kumpermadong patay ang biktima human nakita nga nakasaksak sa dughan ang sundang nga gigamit sa suspek.
Naka-angkon si Gallegos og 5 ka samad dinunggaban sa lawas.
Gikustodiya na sa kapolisan si Mete samtang gi-andam ang kasong murder nga atubangon human desididong mo-file og kaso ang pamilya.

“…kining suspek nga si Julius Mete ug ang biktima nga si Erick Gallegos kauban ni siya og inom didto sa payag aning suspek. Ang kauban nila ani ang asawa sa suspek nga mao si Alma Mete nga igsuon pod sa biktima, abot sa alas sais matud ni Alma nga hubog na siya so natulog na siya. So ang nabilin ang suspek ug biktima tapos walay nakakita sa maong panghitabo unya pag abot sa alas 9: 32 sa gabii kining suspek miduol sa Chief Barangay Tanod ug miingon nga mo surrender siya kay nakapatay siya. Pag abot nila didto kompirmado nga naay namatay didto kaning biktima nga nataod ang kining sundang sa iyang dughan…”
Claveria Municipal Police Station Investigator on Case Police Master Sargent Colombus Tion

Version sa suspek nga self-defense lang ang gihimo niini.

“..self defense iyang gibuhat kay gisumbag kuno siya pagkahuman ang katong sundang iyang gigamit pagpatay nga idunggab kuno to sa iyaha. Mao tong iyang nabawi ug iyang napatay ang biktima. Ang samad 5, duha sa dughan dinunggaban, 1 sa likod dako ug katong duha sa likod ang analisa sa doctor basin nilahos lang..”
Claveria Municipal Police Station Investigator on Case Police Master Sargent Colombus Tion

SOURCE: P.I.#27
Photo: CC