Sunog sa Manggahan, Barangay Balulang ning ciudad, usa ka 1 year old nga bata patay!

NASUNOG -patay ang usa ka 1 year old nga bata human na-trap sa nahitabong sunog sa panimalay sa Manggahan, Barangay Balulang ning ciudad!
Biktima’ng nailang si Carl Anthony Corpuz, nagpangidaron og usa ka tuig ug lima ka bulan.
Base sa initial nga imbestigasyon nga nahuptan pa ang biktima sa uyu-an nga si Nelson Caayaw apan nabuhi-an human kini napaso.
Subli’ng gisulayan sa uyu-an pagluwas ang bata apan wala na niini makaya pa tungod sa kakusog sa kalayo.
Matud ni Carmen Fire Station Chief SFO4 Emmanuel Paculba nga giingong natulog ang bata sa usa ka lawak.

“…subo kaayo paminawon nga naa tay casualty nga bata nga si Carl Anthony Corpuz isa ka tuig ug lima ka bulan, gi attempt kuno siyag kuha saiyang pag-umangkon pero dili na niya kaya tungod kay ni kusog kunog maayo ang kalayo mao tong murag iyang nabuhian kay napaso siya…”
Carmen Fire Station Chief SFO4 Emmanuel Paculba.

Una nang gibutyag ni Nelson Caayaw, uyoan sa biktima nga misulay kini sa pagbubo og tubig aron maluwas ang pag-umangkon apan natagakan kini sa nasunog nga trapal hinungdan nga wala na niini maluwas ang pag-umangkon.
Gibutyag usab ni Caayaw nga kauban sa 1 year old nga bata ang 3-anyos nga igsuon apan nakaambak kini.

“…pag saka nako naay trapal diha sa atubangan sa among balay mao nay natagak sa akoa, ni atras ko ako na untang i-sablig ang tubig wa na sunog naman gyud dako na kaayo ang kalayo…”
Nelson Caayaw, uyoan sa biktima.

Hisayran nga mikabat sa 350,000 pesos ang structural damage sa nahitabong sunog.
Samtang 15 ka panimalay ang nasunog ug 19 ka pamilya ang apektado.
Padayon pa usab nga gi-imbestigaran sa otoridad ang hinungdan sa kalayo.

SOURCE: SR LIVE
Photo Source: SRLIVE