Giingong nagbaha nga smuggled nga sibuyas sa kamerkadohan sa Cagayan de Oro City, hugtanong gihimakak sa BPI-10!
GIHIMAKAK sa Bureau of Plant Industry kon BPI-10 ang alegasyon nga giingong nagbaha ang smuggled onions gikan sa Holland sa mga kamerkadohan sa Cagayan de Oro City!
Sa pamahayag ni BPI-10 Officer In-Charge ug Manager Arnold dela Cruz Jr., nga base sa imbestigasyon ug market monitoring sa nagkalain-laing opisina sa Department of Agriculture sa mga kamerkadohan, wala’y nakitang ebidensya nga nagkatag ang smuggled nga sibuyas sa ciudad.
Gidugang ni Dela Cruz nga padayon’g gimonitor sa regional office ang mga kamerkadohan sa pakigtimbayayong sa DA Regional Field Office ug Agribusiness and Marketing Assistance Service.
Gibutyag usab sa Plant Industry official ang price monitoring sa nagkalain-laing merkado sa ciudad, makita’ng nagkantidad ang wholesale sa lokal ug imported nga pula’ng sibuyas sa 50 pesos ug 65 pesos matag kilo.
Samtang, mapalit ang puti’ng sibuyas sa 65 pesos ngadto 70 pesos matag kilo.
SOURCE: GMA NEWS
Photo Source: RAPPLER
