Babaye, patay human gidaro sa forward truck ang duha ka balay sa Brgy. Lumbia karung buntag!

PATAY ang usa ka babaye ug laing usa samaran human gidaro sa Isuzu forward truck ang duha ka panimalay sa Sitio Cabula, Airport Road Brgy. Lumbia ning ciudad karung buntag!

Biktima’ng patay, 36 anyos giila’ng si Janice Oprido, adunay ka-live in samtang ang samaran giila’ng si Windy Nacua, 30 anyos, minyo, manag-samang residente sa lugar.

Matud ni Traffic Investigator on case Police Chief Master Sgt. Norberto Libres nga samtang padulong ang forward truck sa sentrong bahin sa ciudad nga gimaneho ni John Mark Calit, 36 anyos ug residente sa Zone 9, Greenfield, Brgy. Mabuaya ning ciudad, adunay motorsiklo nga kalit mitabok.

Gisulayan matud pa sa driver nga mo-brake, apan wala nadala hinungdan nga napasok sa duha ka mga balay daplin sa dalan dungan sa paggawas sa biktima’ng si Oprido, kinsa giingong nadat-ugan sa ligid sa sakyanan.

“..atong ma file nga kaso reckless imprudence resulting to homicide, physical injury and damage to property. Ang biktima usa ka pedestrian nga gi nganlan si Janice Oprido, 36 anyos, single may live in partner taga sitio Cabula, Lumbia ning ciudad, naay injury nga minor si Windy Nacua. Ang driver sa Isuzu forward truck mao si John Mark Calit, 36 anyos, minyo taga Zone 9, Greenfield, Mabuaya ning ciudad, matud sa driver paingon siya sa norte nag subay sa inner lane diha nitabok ang usa ka motorsiklo iyang gi breakan wala na niya nadala siguro…”
Traffic Investigator on case Police Chief Master Sgt. Norberto Libres

Hisayran nga ang mga panimalay nga gidaro gipanag-iyahan nilang Rosemarie Piamonte ug Windy Nacua.

SOURCE: SR LIVE
Photo: SR Files