World Jiu-Jitsu Champion Meggie Ochoa, nakasakmit og gold medal sa nagpadayong 19th Asian Games sa Hangzhou, China!

GIDUNGANGAN ni World Jiu-Jitsu Champion Meggie Ochoa ang gold medal ni World No. 2 pole vaulter Ernest John Obiena sa nagpadayong 19th Asian Games sa Hangzhou, China!
Gipukan ni Ochoa si Balquees Abdulla sa United Arab Emirates via 1-0 advantage sa finals sa women’s 48 Kilogram class hinungdan nga nabulsa ang ika-duhang bulawang medalya sa Pilipinas sa quadrennial event.
Ang Asiad gold ang pinakabag-o sa mga koleksyon sa 33-anyos nga si Ochoa gawas pa sa gold medal sa 2023 Asian Jiu-Jitsu championship, duha ka world titles, duha ka bulawang medalya sa Southeast Asian Games ug usa ka medal sa Asian Indoor and Martial Arts Games.
Samtang target usab sa Gilas Pilipinas ang gold medal sa men’s Basketball karong alas 8 sa gabii sa Hangzhou.
Dumduman nga nagdula ang Pinoy cagers sa Asiad Finals niadtong tuig 1990 diin gipangulohan ni PBA Legend Robert Jaworski ang usa ka All-PBA team sa silver medal finish.

SOURCE: PSN
Photo: Dugout Philippines