Usa ka lalaki, giingong patay samtang kapi’g 30 ka indibidwal ang nadala sa hospital human nahilo sa gikaon atol sa kasal sa Alubijid Misamis Oriental.

GITUHUANG patay ang usa ka lalaki ug kapi’g 30 ka bisita sa kasal ang nadala sa balay-tambalanan human gituhuang nahilo sa gikaon atol sa kasal sa Zone Mahogany Alubijid Misamis Oriental!
Base sa report nga natigayon ang kasal niadtong Sabado apan sa sunod adlaw kalit na lamang dungan nga nagsakit ang tiyan sa mga nakakaon hinungdan nga nadala kini sa balay-tambalan.
Giingong wala nadala ang biktimang patay sa balay-tambalanan hinungdan nga nakabsan kini sa hinulamang kinabuhi.

SAMTANG, GIPAMUGOS sa amahan sa kinasal nga wala mangadaot ang mga pagkaon giluto sa kasal sa iyang anak niadtong Sabado sa Zone Mahogany Taparak Alubijid Misamis Oriental!
Human aduna’y usa ka tawo nga namatay ug kapi’g 30 ka indibidwal ang nadala sa balay-tambalan tungod sa food poison.
Matud ni Saldy Pacarro gitarong ang pagluto ug hinlo ang mga pagkaon nga gipakaon sa mga bisita hinungdan nga imposible nga na-food poison kini.
Gitin-aw pa ni Pacarro nga niadto pang Sabado ang kasal hinungdan imposible ang maong pahamtang tungod kaganiha pa sa buntag nadala balay-tambalanan ang mga indibidwal.

“…ang pagkaon namo gi ayo namo nag pagluto kay para na sa among pamilya mao ng kana sila wala gyud mi nga diha ba gyud ni sa pagkaon nakuha. Akong igsuon ug igsuon anang namatay maoy nagluto. Dili taga Dipolog ang nagluto taga dinhi ra , wala sila nagluto. Nganong nagdaut ang tiyan nila amoa wala man katu raman pod sila Sabado pa ang kasal. Basin ang ilang dala nga mga sud an basin nangadaut nato unya ayha pa nila gikaon kay nganong lunes naman diba mapan-os naman na kung maabtan og tulo ka adlaw, wala gi ref..”
Saldy Pacarro, amahan sa babayeng gikasal

SOURCE: SR LIVE
Photo: Alubijid- Rural Health Unit